Items filtered by date: Сентябр 2025

Рӯзи дониш ва Дарси Сулҳ

Ҳамасола дар саросари Тоҷикистон Рӯзи дониш ва Дарси сулҳ таҷлил мегардад, ки ин на танҳо оғози соли нави таҳсил, балки ибтидои маънавии як марҳилаи нав дар ҳаёти наврасон ва ҷавонони мамлакат мебошад.

Рӯзи дониш имсол низ бо як шукуҳу шаҳомати хоса бо иштироки бевоситаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон сурат гирифт. Сараввал Пешвои муаззами миллат бинои нави таълимии Донишгоҳи байналмилалии сайёҳӣ ва соҳибкории Тоҷикистонро мавриди истифода ва баҳрабардорӣ қарор гирифт. Сипас, Президенти Ҷумҳурии Тоҷикистон муҳтарам Эмомалӣ Раҳмон бо аҳли маорифи кишвар мулоқоти судманд доир намуданд.

Дар мулоқоти имсола Пешвои миллат, муҳтарам Эмомалӣ Раҳмон таъкид доштанд, ки дониш инсонро аз ҷаҳолат, нодонӣ ва зулмат раҳоӣ бахшида, ӯро ба самти шуур, ахлоқ, созандагӣ ва тараққиёт раҳнамоӣ мекунад. Шахсе, ки соҳибдониш аст, ба худ эътимод дорад, воқеиятро дуруст дарк мекунад ва метавонад барои беҳтар намудани муҳити худ ва ҷомеа саҳм гузорад.

Илму дониш ҳамчун сарчашмаи асосии пешрафти ҳамаи соҳаҳо аҳаммияти бештар пайдо мекунад. Таъмини рушди устувори иқтисодӣ, истифодаи оқилонаи захираҳои моддӣ ва маънавӣ, ташаккули шаклҳои самараноки идоракунии давлатӣ, татбиқи ҳадафҳои стратегии давлат оид ба баланд бардоштани сатҳи зиндагии аҳолӣ ва муаррифии арзишҳои миллӣ аз сатҳи рушди иқтидори инсонӣ вобаста мебошанд. Барои ноил шудан ба ин ҳадафҳо соҳаи маориф аз ҷониби давлат ҳамчун соҳаи ҳаётан муҳим арзёбӣ карда мешаванд.

Дарси сулҳ бо мақсади ташаккули ҷаҳонбинии сулҳҷӯёна ва тарбияи инсони таҳаммулгаро гузаронида мешавад. Ҳадафи он шинос намудани хонандагон бо арзишҳои сулҳ ва оромӣ, тарбия кардани ҳисси масъулиятшиносӣ ва ватандӯстӣ, мустаҳкам намудани дӯстию ҳамбастагӣ байни миллатҳо, афзун намудани маърифати сиёсӣ ва фарҳангии насли наврасу ҷавон ва баланд бардоштани қадри Истиқлол ва Ваҳдати миллӣ мебошад.

Президенти Ҷумҳурии Тоҷикистон муҳтарам Эмомалӣ Раҳмон таҷлили Рӯзи донишро дар оғози соли хониш яке аз анъанаҳои неки даврони соҳибистиқлолӣ, тантанаву бузургдошти саводу дониш ва хираду маърифати мардуми куҳанбунёди тоҷик маънидод менамоянд.

Пешвои миллат муҳтарам Эмомалӣ Раҳмон соҳаи маорифро сар карда аз зинаи таълиму тарбияи томактабӣ таъкид доштанд, ки ҷиҳати таъмини муассисаҳои томактабӣ бо кадрҳои соҳибтахассус шумораи ихтисосҳои таҳсилоти томактабии шакли ройгон дар муассисаҳои таҳсилоти олии касбӣ зиёд карда шаванд. Ҳамчунин, бо мақсади таъмин намудани муассисаҳои таҳсилоти умумӣ бо кадрҳои омӯзгорӣ Вазорати маориф ва илми Ҷумҳурии Тоҷикистон ва дигар сохторҳои давлатӣ вазифадор карда шудаанд, ки лоиҳаи Барномаи давлатӣ дар самти омода намудани омӯзгорони фанҳои табиатшиносӣ, риёзӣ ва дақиқро омода намуда, дар муҳлати се моҳ ба Ҳукумати Ҷумҳурии Тоҷикистон пешниҳод намоянд.

Инчунин, ҷиҳати гузариш ба низоми 12-солаи таҳсилот, арзёбии сатҳи сифати таҳсилот ва татбиқи низоми бисёрхола дар муассисаҳои таълимӣ дастуру супоришҳои мушаххас дода шуд.

Мо аҳли маорифи кишвар дар ҷавоб ба ҳама дастгириву ғамхориҳои Пешвои муаззами миллат, муҳтарам Эмомалӣ Раҳмон кушиш ба харҷ медиҳем, ки аҳлона кору фаъолият намуда, дар татбиқи сиёсати маорифпарваронаи саҳми арзандаи худро гузорем.

Садуллозода Алишер – сардори раёсати

назорати давлатии муассисаҳои таҳсилоти

томактабӣ, миёнаи умумӣ ва иловагии

Агентии назорат дар соҳаи маориф ва

Илми назди Президенти Ҷумҳурии Тоҷикистон

БО ДОНИШ – БА СӮИ ФАРДОИ ДУРАХШОН

Мо шоҳиди баромади пурмазмуну таъсирбахши Пешвои миллат муҳтарам Эмомалӣ Раҳмон, бахшида ба Рӯзи дониш гардидем.

Ин суханронӣ на танҳо ҳамчун роҳнамо ва дастурамали ҳаёти барои ҷавонон садо дод. Пешвои миллат муҳтарам Эмомалӣ Раҳмон, бо диди амиқ ва нуқтасанҷи хос масъалаҳои муҳими рушди илму маориф, нақши донишҷӯён дар пешрафти Ватан ва масъулияти ҳар як нафарро дар назди ҷомеа таъкид намуданд.

Баромади Пешвои миллат бори дигар собит сохт, ки омӯзгори сутуни асосии давлат, меъморӣ маънавиёт ва калиди саодати миллат мебошад.

Пешвои миллат муҳтарам Эмомалӣ Раҳмон, якчанд нуқтаи асосиро таъкид намуданд:

1.Дониш ҳамчун қимати олӣ - дониш нерӯи асосии пешрафти миллат ва кафолати саодати давлат аст.

2.Нақши омӯзгор - омӯзгор бояд ҳамеша ҳамчун меъмори шахсият ва тарбиятгари насли нав қадр шавад, зеро ояндаи давлат аз заҳмати онҳо вобаста аст.

3.Масъулияти ҷавонон - ҳар як ҷавон бояд ба ҳисси баланди ватандорӣ ва масъулиятшиносӣ таҳсил намоянд ва барои ободии Ватан саҳм гузорад.

4.Дастгирии соҳаи маориф - давлат ва ҳукумат ҳамеша омодаанд барои баланд бардоштани сифати маориф ва шароити таълимӣ чораҳои зарурӣ андешанд.

Пешрафти Тоҷикистонро танҳо тавассути илм ва маорифи муосир метавон таъмин кард. Омӯзгорон бояд аз тарафи ҷомеа ҳамеша эҳимром шаванд, зеро онҳо меъмори ҳақиқии миллат ҳастанд.

Ҷавонон вазифадоранд, ки бо азму ирода таҳсил намоянд ва донишашонро ба нафъи давлату миллат равона созанд.

ПАЁМИ ПЕШВОИ МИЛЛАТ – РАҲНАМО ДАР РӮЗИ ДОНИШ ВА ОҒОЗИ СОЛИ ТАҲСИЛИ 2025–2026

Ҳамасола 1-уми сентябр дар Ҷумҳурии Тоҷикистон ҳамчун Рӯзи дониш ва оғози соли нави таҳсил бо шукӯҳу шаҳомати хос таҷлил мегардад. Ин сана на танҳо оғози дарсҳо, балки рӯзи арҷгузорӣ ба илму дониш, мактабу устод ва таълиму тарбия ба шумор меравад.

Соли 2025 низ, дар ин рӯз Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо як суханронии пурмуҳтаво ба аҳли маориф, омӯзгорон, хонандагону донишҷӯён ва падару модарон муроҷиат намуданд. Паёми эшон чун ҳамеша ҳидоятгар, рӯҳбаландкунанда ва меҳварии сиёсати илму маорифи кишвар буд.

Арзиши дониш ва нақши мактаб

Пешвои миллат дар паёми худ таъкид намуданд, ки дар шароити ҷаҳони муосир, ки илм ва технология босуръат рушд меёбанд, давлат ва ҷомеа танҳо дар ҳолате метавонанд рақобатпазир бошанд, ки ба таҳсил ва таълиму тарбияи насли наврас аҳамияти аввалиндараҷа диҳанд.

Эмомалӣ Раҳмон илму маърифатро «Нури ҳаёт» ва омӯзгорро «Меъмори маънавии миллат» номида, таъкид карданд, ки ҳар фарди бонангу номуси тоҷик бояд таҳсилро вазифаи муқаддаси худ донад.

Пешбурди ислоҳоти соҳаи маориф

Дар паём зикр гардид, ки Ҳукумати кишвар дар солҳои охир садҳо муассисаҳои таълимии нав бунёд карда, ҳазорҳо синфхонаҳоро бо таҷҳизоти замонавӣ таъмин намудааст. Соли таҳсили 2025–2026 бо зиёда аз 100 мактаб ва марказҳои таълимии нав оғоз ёфт.

Пешвои миллат аз масъулин даъват ба амал оварданд, ки сифати таълимро беҳтар намоянд, омӯзгоронро бо курсҳои такмили ихтисос фаро гиранд ва муҳити омӯзиширо ҳар чи бештар замонавӣ гардонанд.

Роҳи рушд – дониш ва худшиносӣ

Дар суханронии хеш Сарвари давлат таъкид намуданд, ки насли ҷавон бояд аз таъриху фарҳанг, забони модарӣ ва арзишҳои миллӣ бохабар бошад. Муҳимтарин роҳи худшиносии миллӣ — омӯзиши илму фарҳанг ва забони модарист.

Инчунин, Пешвои миллат ба хатари таъсири беруна ба зеҳни ҷавонон ишора намуда, масъулият ва бедории фикрии наврасонро муҳим шумориданд. Онҳо таъкид карданд, ки ҷавонон бояд ватандӯст, донишманд, хушахлоқ ва масъули ҷамъият бошанд.

Хулоса Паёми Пешвои миллат бахшида ба Рӯзи дониш дар соли 2025 боз як бори дигар зарурати рушди илму маориф, баланд бардоштани мақоми омӯзгор ва баланд гардидани сатҳи донишандӯзии насли навро дар мадди аввал гузошт. Ин паём роҳнамоест барои ҳар омӯзгор, роҳбари муассисаи таълимӣ, хонанда ва волидайн, то бо масъулияти баланд дар рушди ҷомеаи муосир саҳмгузор бошанд.

*Рӯзи дониш муборак.

Сардори шуъбаи Агентии назорат дар

соҳаи маориф ва илм дар минтақаи

Зарафшони вилояти Суғд

Хуҷамиров Шаҳобуддин

РӮЗИ ДОНИШ ОҒОЗИ РОҲИ НУРИ МАЪРИФАТ

30 август Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ва Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ бо мақсади иштирок дар Рӯзи дониш ва дарси сулҳ ба Донишгоҳи байналмилалии сайёҳӣ ва соҳибкории Тоҷикистон ташриф овард.

Сарвари давлат муҳтарам Эмомалӣ Раҳмон Маркази рушди малакаҳо, касбомӯзӣ ва хизматрасонӣ дар соҳаи сайёҳӣ ва хобгоҳу ошхонаи донишҷӯёни донишгоҳро мавриди истифода қарор доданд.

Иттилоъ дод шуд, ки бинои 8-ошёнаи таълимии маркази рушди малакаҳо дорои 92 синфхона ва 24 ҳуҷраи корӣ мебошад, ки метавонад дар як вақт то 3200 донишҷӯро ба таълиму тарбия фаро бигирад.

Сарвари давлат қайд карданд, ки дар шароити имрӯзаи ҷаҳони муосир фароҳам овардани имконияти зарурӣ барои илму донишомӯзшии ҷавонон муҳимтарин василаи омода кардани кадрҳои баландихтисоси хештаншинос ба ҳисоб меравад.

Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон пас аз ифтитоҳи бинову иншооти нав дар Донишгоҳи байналмилалии сайёҳӣ ва соҳибкории Тоҷикистон дар ҷамъомад ба муносибати рӯзи дониш бо аҳли маорифи кишвар мулоқот ва суханронӣ намуданд.

Сарвари давлат муҳтарам Эмомалӣ Раҳмон вохӯрии имрӯзаро фурсати хубе барои таҳлилу баррасии вазъи соҳаи ҳаётан муҳим – маориф арзёбӣ намуданд.

Таъкид гардид, ки бо шарофати истиқлолу озодӣ, сулҳу суботи комил ва ваҳдати миллӣ дар Тоҷикистони азизи мо барои илму донишомӯзии насли наврас ва ҷавонон тамоми шароиту имкониятҳои зарурӣ муҳайё карда шудааст.

Ба таъкиди Роҳбари давлат муҳтарам Эмомалӣ Раҳмон тамоми пешрафту дастовардҳои кишвар, аз ҷумла дар соҳаи маориф, ҳаёти шоиставу осоиштаи мардум, пеш аз ҳама, ба пойдории сулҳу оромӣ ва суботи сиёсӣ вобаста мебошад.

Пешвои миллат муҳтарам Эмомалӣ Раҳмон сулҳро сари баланду қомати болои мардум, бахту саодати ҳар як хонадон ва асоси пешрафти давлату миллат, аз ҷумла рушди соҳаи маориф арзёбӣ намуданд.

Сарвари давлат муҳтарам Эмомалӣ Раҳмон пешниҳоди ташаббуси навбатии Тоҷикистон доир ба “Даҳсолаи таҳкими сулҳ ба хотири наслҳои оянда”-ро идомаи мантиқии талошҳои сулҳхоҳонаи кишвари мо дар арсаи байналмилалӣ номиданд.

Дар робита ба раванди ислоҳоти соҳаи маориф таъкид гардид, ки дар 34 соли соҳибистиқлолӣ ба ин соҳа аз ҳисоби буҷети давлатӣ 67,4 миллиард сомонӣ ва аз ҳисоби лоиҳаҳои сармоягузории давлатӣ 6,2 миллиард сомонӣ, яъне дар маҷмуъ, 73,6 миллиард сомонӣ маблағгузорӣ гардидааст. Имрӯз дар соҳаи маориф 11 лоиҳа ба маблағи 4 миллиарду 300 миллион сомонӣ татбиқ шуда истодааст.

Таъкид гардид, ки тайи даврони соҳибистиқлолӣ музди меҳнати кормандони соҳа давра ба давра беш аз 20 баробар зиёд карда шуд.

Роҳбари давлат аз ҳамкории соҳибкорони бонангу номус ва шахсони саховатпеша бо Ҳукумати кишвар дар ин самт ёдовар шуданд. Хотирнишон гардид, ки тайи даврони соҳибистиқлолӣ аз ҷониби соҳибкорони ватандӯсти кишвар ва шахсони саховатпеша ба маблағи 1 миллиарду 700 миллион сомонӣ 1435 муассисаи соҳаи маориф бо 231 ҳазор ҷойи нишаст сохта, ба истифода дода шудааст.

Сарвари давлат муҳтарам Эмомалӣ Раҳмон ба таваҷҷуҳи хосаи Ҳукумати кишвар вазъи муассисаҳои таҳсилоти ибтидои ва миёнаи касбиро мавриди таҳлил қарор дода диққати иштироккунандагонро бо ин зинаҳои таҳсилот ҷалб намуданд.

Барои рушди таҳсилоти ибтидои ва миенаи касбӣ, ки яке аз зинаҳои муҳимми соҳаи маориф маҳсуб меёбад, сарвари давлат таҳия ва қабули Барномаи давлатии рушди муассисаҳои таҳсилоти ибтидоӣ ва миёнаи касбиро барои солҳои 2026-2030 иқдоми зарури арзёбӣ намуданд.

Роҳбари давлат иброз доштанд, ки ҳоло дар ҷуҳури 86 муассисаи таҳсилоти миёнаи касбӣ аз руйи 250 ихтисос мутахасис омода мекунанд.

Сарвари давлат таъмин намудани муассисаҳои таълимиро бо кадрҳои омӯзгорӣ яке аз масъалаҳои асосӣ дар соҳаи маориф номида, сохторҳои марбутаро вазифадор намуданд, ки дар муддати як сол масъалаи норасоии кадрҳои омӯзгориро пурра бартараф намоянд.

Ҳамзамон, Сарвари давлат масъалаҳои вобаста ба зинаи таҳсилоти ибтидоӣ ва миёнаи касбӣ, оид ба ҳарчӣ бештар ба касбомӯзӣ фаро гирифтани шаҳрвандон, таҳия ва чопи китобҳои тахассусиро таҳлилу баррасӣ намуда, барои ислоҳи камбудиҳои ҷойдошта дастуру супоришҳо доданд.

Дар идомаи суханронӣ Роҳбари давлат муҳтарам Эмомалӣ Раҳмон ба масъулини соҳаи маориф супориш доданд, ки барои омода кардани омӯзгорони соҳаи табиатшиносӣ, дақиқ ва риёзӣ, ки яке аз масъалаҳои муҳим дар низоми маорифи кишвар маҳсуб меёбад, чораҳои таъхирнопазир андешанд.

Президенти кишвар муҳтарам Эмомалӣ Раҳмон дар бораи мақому манзалати омӯзгор андешаронӣ намуда, таҳия ва қабули Қонуни Ҷумҳурии Тоҷикистон “Дар бораи мақоми омӯзгор”-ро нишонаи олии эҳтирому қадршиносии омӯзгор аз тарафи Ҳукумати Ҷумҳурии Тоҷикистон номиданд.

Дар фароварди сухан Роҳбари давлат иброз доштанд, ки қарзи фарзандӣ ва вазифаи шаҳрвандии мову шумост, ки ба хотири пешрафту ободии диёри баҳиштосои худ, хусусан, дар доираи омодагӣ ба ҷашни бузурги миллиамон — 35-солагии истиқлоли давлатӣ пайваста заҳмат кашем ва обрӯи Тоҷикистони маҳбубамонро дар арсаи байналмилалӣ боз ҳам баланд бардорем.

Сафарзода Сафармад Саид – сардори раёсати

назорати давлатии муассисаҳои таҳсилоти ибтидоӣ,

миёнаи касбӣ ва таълими каонсолони Агентии назорат дар

соҳаи маориф ва илми назди Президенти Ҷумҳурии Тоҷикистон